Kau atu ‘a e TIA mo e Sustainably ki he fakamo’opo’opo Saikolone Gita ^Featured

Ko e polokalama ko’eni ko e tokoni ki hono fakama’opo’opo mo fakama’a ‘a e ngaahi ‘api ‘a ia na’e ‘ikai fu’u a’u kiai ha tokoni ki he fakama’opo’opo pea na’e fakahoko ‘eni ‘e he fanauako ‘a e TIA pea na’e poupou fakapa’anga kiai ‘a e Kautaha Sustainably mei ‘Aositelelia.

Ko e kautaha Sustainably ‘oku nau peisi ‘i Senee pea koe konga ‘enau ngāue ‘oku kaungatonu ki hono tokangaekina ‘a e Feliuliuaki ‘a e ‘Ea mo e Ngaahi Fakatamaki Fakaenatula pehe ki he teuteu’i ‘o e kakai kenau mateuteu ange ki ha fakatamaki fakaenatula.

Na’e fakahoko ‘e he kautaha ni ‘i he ta’u 2017 ‘a e poloseki ‘a e CRSP (Climate Resilience Sector Project Tonga) ‘i he malumalu ‘o e Potungāue MEIDECC pea fakapa’anga ‘e he Pangikē ‘a Langa Fakalakalaka 'a 'Esia hono ako’i ‘a e kau ngāue faka-Pule’anga kenau toe mateuteu ange ‘i he founga kehekehe ‘i he levolo faka-polofesinale ke talia ‘a e fakatamaki fakaenatula ‘o kau ai mo e feliuliuaki ‘a e ‘ea mo e ngaahi kaveinga fekau’aki (Climate Resilience Sector Project Tonga – professional short term training program).

Na'e kau atu foki 'a Dr. Viliami Uasike Latu mei he TIA fakataha mo Dr. Fabian Sack koe Talekita Pule 'o e Sustainably pehe ki hono hoa Judy Turnbull ki hono fakalele 'o e poloseki ko'eni mo e kau mataotao kehe mei 'Aositelelia.

Ko e polokalama fakama’opo’opo ko’eni na’e fakahoko ia ‘i he ‘elia ‘o Tu’atakilangi ‘i Longolongo pea ‘au mai ai pe ki he ‘apiako ‘i he Tevita Misa Fifita Building ‘i he Hala Taufa’ahau.

Fakatatau ki he lau ‘a e Puleako Dr. Siosaia Langitoto Helu koe konga pe ‘eni ‘a e fengaue’aki mo e poupou ‘a e TIA pehe ki he Sustainably ki he fakaakeake mei he Saikolone ko Gita pea ‘oku ne ‘omai ‘a e ‘ata ‘o e ngāue fakataha ke tokoni ki he fakaakeake ‘a e fonua mei a Gita.