Pekia matāpule Tonga ‘i he toli ‘i ‘Aositelēlia Featured
8 Sanuali, 2018. Kuo malōlō ha matapule ta’u 35 Tonga na’e kau atu ki he polokalama toli ‘akau ‘i he vahenga Bundaberg ‘i Kuinisilani ‘i ‘Aositelēlia.
Fakatatau ki he fakamatala mei he ongoongo 'a e Courier Mail na’e hoko ‘a e pekia ko’eni fakafuofua ki he taimi 7 ‘o e pongipongi Tu’apulelulu uike kuo ‘osi pea na’e pau ai ke ui ‘a e kau Polisi ki he feitu’u ni.
‘Oku mahino pe foki fakatatau ki he fakamatala ’a e Courier Mail kuo fakahā ‘e he kau polisi ‘oku ‘ikai ha hu’uhu’u ki he tupu’anga ‘o e pekia ko’eni ‘a e matāpule ta’u 35 Tonga ko’eni ka 'oku te'eki ke maau kakato 'a e ngāue kiai 'a e kau polisi.
Ko e a'u ‘aki ‘eni ki he toko 13 kuo pekia ‘i he polokalama toli ‘akau pea ‘oku ‘i ai a’ e hoha’a ‘a e kau ma’u mafai ‘i ‘Aositelelia ke toe fai hano vakai’i ‘a e polokalama mo e tupu’anga ‘o e ngaahi pekia ni.
‘Oku mahino pe foki fakatatau ki he ongoongo ‘a e Courier Mail ‘oku teuteu ‘a e kainga Tonga ‘i he vahenga ni ke fai ha ouau fakamanatu ‘o e me’afaka’eiki pea ‘oku te’eki ke mahino mai ‘a hono fakaikiiki.
