Holo tokolahi kau nofo ‘ova mei Tonga ‘i Nu’usila Featured
Tokoni Pule 'Univesiti 'o Massey Palofesa Paul Spoonley
9 ‘Okatopa, 2017. Kuo fakaha ‘e ha lipooti na’e fakahoko ‘e he ‘Univesiti ‘o Massey ma’ae ‘Imikuleisoni ‘a Nu’usila ‘oku holo ‘a e tokolahi ‘o e kau nofo ‘ova mei Ha’amoa mo Tonga ‘i Nu’usila mei he laka hake he toko 20,000 ki he laka hake pe he toko 10,000.
Na’e fakaha foki ‘e he tokoni pule ‘o e ‘Univesiti Massey Palofesa Paul Spoonley ko e holo ko’eni ‘oku ne fakafofonga’i ‘a e holo vahe tolu ‘e ua (2/3) ‘o e katoa ‘o e kau nofo’ova ‘i he fonua falakufua.
Na’a ne toe fakapapau’i foki ‘oku hala ‘a e pehe ko e tokolahi taha ‘o e kau nofo ’ova ‘i he fonua ko e kakai Tonga.
Na’a ne toe fakamahino ‘oku fihi ‘a hono tala pe koe fe fonua ‘oku tokolahi ‘ene kau ‘ova he ‘oku makatu’unga pe ia ‘i he founga mo e anga hono foaki ‘o e ngaahi visa folau ki Nu’usila.
Fakatatau ki he lau ‘a Palofesa Paul Spoonley ko e polokalama toli ‘akau mo e founga fo’ou ki hono muimui’i ‘o e ngaahi visa ‘oku kaunga lahi ia ki he holo ko’eni.
