Ta'efiemalie ki he 'eke totongi Komisoni Fakamafolalea ‘a Tonga ki hono fakamafola va’inga ‘Ikale Tahi ^Featured

‘Oku fakatumutumu foki ‘a e ngaahi kautaha ongoongo ‘o tatau pe ‘i he ngaahi letiō taautaha, ngaahi nusipepa, ngaahi mītia ‘oku pulusi ‘i he ngaluope ‘i he tu’utu’uni ko’eni ‘a ia koe ‘ene toki hoko ‘eni ‘i Tonga ni.

Na’e angamaheni ‘aki pe foki hono faka’atā tau’atāina ‘a e ngaahi kautaha ongoongo kenau fakahoko ‘a e fatongia ko’eni telia ‘a e kakai ‘o e fonua ka ‘oku kehe ‘a e fo’i hū ia ko’eni.

Kuo fakahā foki ‘e he Sea ‘o e Kosilio Sipoti ‘a Tonga (Tonga Sports Council) ‘Ikani Taliai ‘oku nau foaki ‘a e totonu ko’eni (media right) ki he Komisoni Fakamafolaela ‘a Tonga he ‘oku lahi honau mo’ua kiate kinautolu.

Kaikehe na’e kole ngofua foki ‘a e ngaahi kautaha ongoongo ki he Potugāue Ngaahi Ngāue Faka-lotofonua ‘a ia ‘oku fakamalumalu ai ‘a e sipoti pea na’e fakahā kenau fetu’utaki ki he Letiō Tonga.

Ko e ongo va'inga foki 'e ua 'oku 'amanaki fakahoko 'a ia koe fepaki 'a e Toko 15 'a e Palesiteni mo e Papeliane pehe ki he 'Ikale Tahi mo e Western Force.

Kuo fakamahino foki mei he Komisoni Fakamafolalea ‘a Tonga koha fa’ahinga kautaha ongoongo kuopau kenau totongi ‘a e “media right” ko e $1000 ki he fo’i tau pea $2000 ki he fo’i tau loua ‘i he ‘aho ni. Ko e ngaahi nusipepa leva mo e ngaahi mītia ‘i he ngaluope tenau totongi ‘a e pa’anga ‘e $100 ki he fo’i tau pe koe pa’anga ‘e $200 ki he ongo va’inga lōua.

‘Oku fehu’ia lahi foki ‘eni ‘e he ngaahi kautaha ongoongo he ‘oku ‘ikai koha tau tesi ‘eni ka koe va’inga faofao mo teuteut ‘a e ‘Ikale Tahi ki he Ipu ‘a Mamani pea kapau na’a koha tau tesi pea ‘oku mahino ‘e lōketi ‘a e totongi ki ‘olunga.

‘I he taimi tatau ‘oku toe fehu’ia ‘a e halanga ‘oku ‘unu atu kiai ‘a e tau’aāina ‘a e ongoongo mo e totonu ke ‘ilo ‘a e kakai ki he ngaahi me’a ‘a e fonua ‘a ia na’e anga maheni ‘aki hono tukuatu tau’atāina mo ‘ikai ha totongi ki mu’a atu.

Na’e fakamahino mai foki mei he Komisoni Fakamafolalea ‘a Tonga ko e tu’utu’uni ke ‘eke ‘a e ngaahi totongi ki he ngaahi kautaha mītia na’e makatu’unga ia ‘i he alea ‘a e Kosilio Sipoti ‘a Tonga mo e Komisoni.

Kuo fakamahino mei he tokolahi ‘o e ngaahi kautaha ongoongo fakalotofonua ‘e ‘ikai kenau lava atu ke fakamafola ‘a e va’inga ni ‘o makatu’unga ‘i he totongi ko’eni ‘oku ‘eke ‘e he Komisoni.