Fokotu'u 'a Setita Tui'onetoa ke pule 'i he Letio Tonga ^Featured

'Oku 'ikai foki ke fo'ou 'a e ongoongo ko'eni he kuo 'osi 'ohake foki ia 'i he mitia faka-sosiale pehe ki he ngaahi kautaha ongoongo 'a e ngaahi talotalo 'a e tokolahi makatu'unga he toutou 'asi 'a Setita 'i Tonga ni mo e ngaahi polokalama 'a e Televisone Tonga pehe ki he'ene fekau'aki moe PTOA mo e Palemia.

Na'e toe tuku mai foki he ngaahi mitia fakasosiale 'a e pehe na'e folau 'a e Pule Le'ole'o Solomone Finau mo e Sea 'o e Poate Komisoni Fakamafolalea 'a Tonga Leonaitasi Hoponoa ki Nu'usila 'i he ngaahi mahina kuo tau situ'a kiai pea na'e 'i ai 'a e fakamatala na'a na a'u ai pe kia Setita fekau'aki mo e lakanga ni.

'Oku mahino foki 'i he ma'u ia 'a e ongoongo ni na'e te'eki ke tu'uaki 'a e lakanga ko'eni 'o hange koe founga ngaue anga maheni ke tohi atu kiai 'a e kakai taukei mo ako lelei 'i he mala'e ni pea 'i he'ene tu'u koia 'oku mahino leva ko hono fokotu'u pe 'eni 'o Setita mei he Poate mo e Pule'anga.

Ko Setita foki na'e lele pe 'ene TV 'oku ui koe TNEWS pea na'e mahino pe foki 'a e tu'u'anga ia 'o e ongoongo 'a Setita 'a 'ene poupou fefeka ma'u pe ki he Palemia Samuela 'Akilisi Pohiva.

'I he tu'unga leva ko ia  'oku 'ikai toe veiveiua ke pehe koe taha pe 'eni ia 'o e  ngaahi faka-pale 'a e Palemia ki hono kau muimui mo hono kau poupou neongo hono toutou tukuaki'i ki he filifilimanako (nepotism) mo hono tukufakatafa'aki 'a e lao mo e founga ngaue ki hono fili 'oha tokotaha ngaue.

Ko e fakamatala 'oku ma'u 'e he ongoongo ni 'e kamata ngaue 'a Setita 'i he lakanga ni 'i he uike kaha'u.