Tuku ngaue ‘a e kau Faiako Tonga High School ta’efiemalie ‘i he founga PMS Featured
13 Sepitema, 2018. ‘Oku ‘i ai ‘a e hoha’a lahi ki he tukungaue kuo kamata mai ‘i he kau faiako ‘a e Ako Ma’olunga Tonga ‘i he’eneu ta’efiemalie ki he anga hono ngaue’aki ‘a e founga ko hono sivi’i fakata’u ‘a e tu’unga ‘o e ngaue ‘a e tokotaha faiako pe ngaue faka-Pule’anga pea ‘e toki makatu’unga mei ai hano hiki hono vahenga pe ‘ikai.
Ko e founga foki ‘eni ‘oku ‘iloa koe Performance Management System (PMS) pea ‘oku ngaue ‘aki ‘e he ngaahi Potungaue ‘a e Pule’anga talu mei hono fokotu’u ‘e he Komisoni ki he Kau Ngaue Faka-Pule’anga (PSC) mei he mahina ko Siulai ‘o e ta’u 2014.
Ko e founga anga maheni foki ki mu’a ‘i Siulai 2014 kuo pau ke hikihiki pe ‘a e vahenga ‘o e kau ngaue faka-Pule’anga fakata’u (annual increment) ‘o ‘ikai toe makatu’unga ia ‘i hano sivi’i ‘a e tu’unga ‘o ‘enau fuafatongia (performance).
Kaikehe koe founga fo’ou foki ko’eni ‘oku pau ke sivi’i fakafou ‘i he PMS ‘a e fakahoko fatongia ’a e tokotaha ngaue kotoa pea toki malava mei ai ke hiki vahenga ‘a e tokotaha ngaue faka-Pule’anga.
Kuo ma’u foki ‘e he ongoongo ni na’e ‘ikai fiemalie ki heni ‘a e tokolahi ‘o e kau faiako ‘a e Tonga High School pea na’e pau ai kenau hu ki tu’a 'i he ho'ata 'aneafi 'aho 12 'o Sepitema pea ko hono fakalea ‘e taha koe tuku ngaue.
Ko e founga PMS ‘oku mahino hono ngaue mai ‘aki mei he ngaahi ta’u ki mui ni mai ‘oku toe tokosi’i ange ai ‘a kinautolu ‘oku malava ke hiki honau vahenga fakata’u pea ‘oku ‘i ai ‘a e ngaahi Potungaue ia ‘oku si’i hifo he peseti ‘e 50% ‘a kinautolu ‘oku malava ke hiki vahenga 'o makatu'unga pe 'i he lelei 'enau fuafatongia.
‘I he sio tau’ataina ki he founga ko’eni ‘oku ‘i ai hono lelei lahi kapau ‘e fakahoko ‘aki pe ‘a e founga ni tau’ataina ‘o ‘ikai toe makatu’unga ‘i he ‘uhinga mei tu'a 'oku 'ikai fekau'aki mo e fua fatongia pe ‘atakai kehe pea koe founga fakamamani lahi foki ‘eni.
Kaikehe ‘oku ikai foki ke fiemalie ‘a e tokolahi ‘o e kau ngaue faka-Pule’anga ki he founga ko’eni pea kuo hoko ai ‘a e hu ki tu’a ‘a e kau faiako ‘a e Tonga High School.
‘Oku mahino ‘oku ‘i ai ‘a ‘enau makatu’unga mo e ‘uhinga ki heni ka ‘oku ‘ikai ma’u ha faingamalie ke ‘omai ha’a nau lau.
