Loloa ange hono tapuni ‘o e Fale Alea koe fa’ifa’iteliha ange ia ‘a e Pule’anga ^Featured

‘Oku fili mai ‘e he kakai mo e hou’eiki ‘a e kau memipa ki he Fale Alea pea ‘oku fili leva mei ai ‘a e Palēmia mo e Pule’anga pea nau taliui leva ki he Fale Alea ‘a ia ko e kakai ia mo honau kau Fakafofonga.

Ko e fatongia leva ‘o e Fale Alea koe fa’u lao mo hono fakapapau’i ‘a e ‘alunga totonu ‘o e koloa ‘a e fonua mo e mafai pea fakapapau’i koe ngaahi ngāue ‘a e Pule’anga mo e fonua ‘oku fakahoko lelei ‘o fakatatau ki he lao.

Ko e me’a ‘oku hoko he ngaahi ta’u si’i mai ko’eni kuo tau situ’a kiai koe fu’u si’isi’i ange ‘a e Lao Fakaangaanga kuo fakahū mai ki he Fale Alea ‘o tipeiti’i mo fakapaasi.

Ko e lahi taha foki ‘a e lao ‘oku fakahū mai ki he Fale Alea koe hu’u mei he Pule’anga pea ‘oku tātātaha pe ha lao fakataautaha ‘e fakahū mai ki he Fale Alea mei he Hou'eiki memipa.

Ko e poini heni koe fu’u lahi hono tapuni ‘o e Fale Alea pea ‘oku ho’ata mai leva ‘a e fa’ifa’iteliha ‘a e Pule’anga he ‘oku ‘ikai ha fu’u fakafepaki kiate kinautolu tukukehe ange ‘a e ngaahi mitia mo e mitia faka-sosiale ‘oku nau tu’u ke fakahoko ‘a e fatongia fakaanga ‘a ia ‘oku totonu ke fakahoko ‘i he Fale Alea.

‘Oku fu’u ‘ilonga hono pule’i ‘e he Palēmia ‘a e Fale Alea ‘o nau toki loto pe ke ui ‘i ha’anau fiema’u ka ‘oku fie ongo atu ‘a e kakai mo e fonua pe koe ha ‘a e ngāue ‘a e Fale Alea ‘e fakahoko ki he ngaahi hoha’a fekau’aki mo e ngaahi valau mo e ta’e fiemalie ‘i founga hono fakalele ‘o e Pule’anga pea ‘oku lahi 'a e faihala mo e ngaahi fakamo’oni kiai.

Kuo tuku atu ‘a e ngaahi tohi tangi ki he Fale Alea ‘i he konga kimu’a ‘o e ta’u ni pea koe talu ai pea tapuni ‘a e Fale Alea ia ka koe ngaahi ‘isiū ‘eni ‘oku vivili pea mahu’inga ki he kakai mo e fonua.

‘Oku fehu’ia foki mo e vahenga kuo foaki ki he kau memipa ‘o e Fale Alea hili koia ‘oku lahi ange ‘a e taimi tapuni ia ‘a e Fale pea lahi nage moe taimi folau ia 'a e kau Minisita mo e Palemia.

Ko e fatongia totonu ‘eni ia ‘o e Sea ‘o e Fale Alea ke fakamahino ‘a e kehekehe mo e mavahevahe 'a e mafai (separation of powers) pea tu’u ‘a e Fale Alea ko e sino tau’atāina ke fakahoko hono fatongia ka ‘oku ‘ikai koe hange koe ‘alunga ‘o e ‘aho ni ke toki fie Fale Alea pe ‘a e Pule’anga pea toki ui.

Ko e ‘ata ‘eni ia ‘o e fonua pōpula mo fakaaoao ‘oku hoko ‘i he ‘aho ni pea ko’ene toki hoko ‘eni ‘a e me’a pehe ni talu ‘a e lele mai ‘a fonua ni.

'Oku totonu mo taau ke fakahoko 'e he Sea 'o e Fale Alea hono fatongia pea fai ha'ane tu'utu'uni pea tokoni kiai 'a e Hou'eiki Memipa ke fakahoko ha ngaue ki he kaveinga ni he 'oku mafatukituki hono mahu'inga.