Fiema’u ke fakafisi leva ‘a e Palemia ‘Akilisi Pohiva Featured
1 Sepitema, 2018. Ko e fekau ia kuo tuku mai mei he ni’ihi ‘o e kainga Tonga ‘i Nu’usila ‘a ia na’a nau a’utonu hake ki he ‘api ‘o e Pule’anga Tonga ko ‘Atalanga ‘i ‘Aokalani Nu’usila.
Na’e a’u tonu hake foki ‘a e ni’ihi ko’eni mo ‘enau ngaahi pena ‘a ia kuo ‘osi tohi ai ‘o tatau pe ‘i he lea faka-Tonga mo e lea faka-Pilitania ‘a ‘enau faka’amu ke fakafisi ‘a e Palemia mei hono lakanga.
‘Oku tukuaki’i foki ‘e he ni’ihi ko’eni ‘a e Palemia ki he faihala mo e ta’efe’unga ‘a ‘ene fakalele ‘a e fonua pea mo ‘enau matu’aki kole pe ke fakafisi.
Na’e taki foki ‘a e fakahahaloto ko’eni ‘e Siosiua Toki mo Kelekolio Tapueluelu ‘a ia na’e fakahoko pe he founga ‘oku melino pea na’e ‘ikai ha palopalema ‘e hoko heni.
Kuo ‘osi fokotu’u foki ‘i Nu’usila ‘a e komiti ‘a ia ‘oku nau taumu’a ki he langa fonua pea koe konga ‘o ‘enau ngaue ko hono faka’ilo ki he kakai ‘o e fonua ‘a e ngaahi faihala ‘oku hoko ‘i he Pule’anga Tonga.
Na’e folau atu foki ‘a e Palemia ‘aneafi ki Naulu ke kau atu ki he fakataha hono 49 ‘a e kau taki ‘o e Pasifiki pea na’e fou atu foki ‘i Nu’usila.
Ko e ma’u foki ‘a e ongoongo ni na’e fakataumu’a ‘a e fakahahaloto ko’eni ki he ‘amanaki folau atu ‘a e Palemia.
