'Ofa mai 'o ta'ofi polokalama talanga Sea Poate 'a e Letio Tonga ^Featured

17 'Akosi, 2018

‘Etita,

‘Oku ou loto keu fakahoko atu e tohi ni mo ‘eku matu’aki kole fakamamate ki he Sea ‘o ‘etau Poate Komisoni Fakamafolalea ‘a Tonga Leonaitasi Hoponoa ke fakamolemole ‘alaa kae fakatatafi atu ‘ene polokalama talanga fakafonua he ‘oku ne takihala’i e kakai ‘o e fonua.

‘Oku mole ke mama'o ha loto 'e tataka ka 'oku ou 'ilo 'oku ‘i ai ‘eku totonu faka-Konisitutone koe tangata totongi tukuhau mo e tangata'ifonua Tonga keu ‘oatu hoku le’o mo fakahoko atu ‘a e kole ni pea ‘oua mu’a na’a ‘itengia au he ‘oku ou fakafofonga’i atu ‘a e tokolahi ‘i he fonua ‘emau pango’ia ‘i he polokalama ‘a e motu’a ni.

‘Oku ‘ikai ha me’a fo’ou tene ‘omai hala 'ataa ka ko hono faka’uhinga hala’i pe ‘a e ngaahi kaveinga mahu’inga he fonua ‘a ia ‘oku lolotonga fakahoko pe ‘a e ngaue kiai ‘a e ngaahi kupu ‘o e sosaieti ‘oku nau ‘ilo lelei mo fakahoko lelei ‘a e ngaahi fatongia fekau'aki mo e ngaahi kaveinga ko’eni.

Ko 'ene me'a 'oku fai ko hono fakamoleki 'a e pa'anga  totongi tukuhau 'a e kakai 'o e fonua.

‘Oku ‘i ai ‘a e ngaahi Potungaue ‘a e Pule’anga kau ia ‘a e Potungaue Polisi mo e Fakamaau’anga, ngaahi siasi mo 'enau ngaahi polokalma, ngaahi kulupu to’utupu, soasieti sivile, ngaahi kautaha ta’e fakapule’anga,  ngaahi kautaha tokoni mei muli, ngaahi va fengaue'aki mo e ngaahi fonua 'oku nau tokoni mai pehe ki he ngaahi kupu ‘i he soasieti ‘oku nau ngaue ki he ngaahi kaveinga mahu’inga ‘oku valelau mai kiai ‘a e motu’a ni pea ‘oku nau nofo taha ki hono kumi ha faito’o ki he ngaahi palopalema ‘oku hoko ‘i he fonua.

‘Oku ongo ‘Etita 'a e fa'aahinga ‘ai’ainoa’ia ko’eni he ‘oku ‘i ai ‘a e fatongia totonu ia ‘o e Komisoni ke fakahoko ki he fonua koe pisinisi mo tufaki ‘a e fakamatala pea ‘oku mahu’inga ke takitaha tu’u hono fatongia.

‘Oku lolotonga to lalo ‘a e ongoongo mei hono fakahoko mai ‘e he’etau Letio mo e  Televisone pea lolotonga ia ‘oku lele mai ‘a e polokalama ta’e’uhinga ko’eni.

Fakamolemole pe ki he Sea e Poate kake tali mu’a ‘a e kole ni he ‘oku ou tui ko’ene toki hoko ‘eni ha polokalama maumau taimi pehe ni 'i he Komisoni ‘a e fonua.

Faka’apa’apa Atu,

‘Eliesa Fifita

Tufuenga-Kolomotu’a