Fekau'i ‘e he Minisita Leipa Tu’i Uata ‘a e CEO Edgar Cocker ke fakafisi ^Featured

Kuo toutou mama mai foki ‘a e ngaahi fakamatala fekau’aki mo e to kehekehe ‘a e ongo taki ni pea ‘oku mahino ngofua pe foki ‘eni ki he anga e vakai 'a e tokolahi.

Kapau tetau vakai atu ki hona puipuitu’a mo ‘ena taukei ‘e malava ke mahino mei ai ‘a e ‘uhinga ‘o e toutou feteleni ‘a e ongo tama ni pea 'oku poupou ki heni 'a e ngaahi fakamatala kuo tuku mai 'a e ngaahi kautaha ongoongo.

Ko Edgar Cocker ‘oku ‘ikai sola kiai ha taha he na’e ‘osi CEO pe 'i he Pule’anga ki mu’a ‘i he Potungaue Takimamata pea ‘oku ‘i ai ‘ene taukei lahi mo ‘ene ‘ilo ki he founga ngaue pe he ki he tu’utu’u ni ngaue mo e lao ‘oku fakalele ‘aki ‘a e Pule’anga.

Na’a ne ‘osi ngaue foki ki he ngaahi kautaha fakavaha’a-Pule’anga pea koe tangata pisinisi foki ‘a Cocker ‘o ‘ikai sola kiai ha taha tukukehe ange ‘ene ma’u faka’ilonga fakaako he mala’e ‘o e pisinisi mo e ‘ikonomika.

Ko e Minisita ‘i he tafa’aki ‘e taha ‘oku te’eki ke lava ha ta’u ‘ene hoko koe Minisita pea ‘oku ‘ikai ha’ane taukei ‘i he ngaue ‘i he Pule’anga tukukehe ange ‘a e fehu’ia ‘ene ako na’e fakahoko pea koe tu’unga ‘ene fakalele pisinisi ‘oku mahino ki he Tonga kotoa.

Ko Uata ‘oku kau ia he hingoa ‘oku fehu’ia ma’u pe pea ‘oku ‘ohake mo ‘ohifo ‘i he mala’e ‘o e politikale pea na’e fili mai pe ke hoko koe Minisita ‘e he Palemia ‘o makatu’unga ‘i he tauhi va mo e feohi fakakaungame’a.

‘Oku fehu’ia ma’u pe ‘ene ngaahi tu’utu’uni ‘i he mitia pea 'oku 'i ai mo hono ngaahi mo'ua kuo tuku mai 'e he ngaahi kautaha mitia pea na’e fakahoko 'a e tohi tangi 'a e kakai ki he Fale Alea fekau’aki mo ia tukukehe ange ‘a hono faka’ilo ki he fakamatala loi mo e lau’ikovi’i.

Kaikehe ‘oku mahino mai ko e ta’efiemalie ‘a e Minisita ‘i he ‘ikai ke fakahoko ‘e he CEO ‘a ‘ene ngaahi tu’utu’uni ‘a ia ‘oku tui foki ‘a e CEO ia ‘oku totonu ke fou ‘i he founga mo e tu’utu’uni ngaue pehe ki he lao ‘o e fonua.

‘Oku ma’u foki ‘a e fakamatala falala’anga ko e feteleni fakamuimui taha ko hono fehu’ia ‘e he CEO ‘a e ngaue ‘a e Minisita ‘a ia ‘oku ne tui ‘oku ‘ikai fou he founga mo e lao fekau’aki mo e totongi mo e hu mai ‘o e lolo pea na’e ta’efiemalie heni ‘a e Minisita ‘o tu’utu’uni ai kene fakafisi.

Kuo lahilahi hono teu tuli 'o e kau CEO 'a e Pule'anga 'ehe kau Minisita pea 'oku mahino 'oku 'i ai 'a e me'a lahi 'oku hoko 'i hotau ki'i Pule'anga ni.

‘Oku ‘ikai foki koe Minisita fakatatau ki he tu’utu’uni ‘a e lao ‘oku aofangatuku ki hano fakamalolo’i ha CEO he koe fatongia ia ‘o e PSC ka ‘oku pau ke ‘i ai ha’ane makatu’unga malohi kiai pea ‘omai pe koe ha ‘a e maumaulao ‘a e CEO.