Ko e toe totonu mo e tau’atāina fē ‘oku feinga kiai ‘a e kau faka-fāfine? ^Featured

Nuku'alofa

14 Siulai, 2018

‘Etita,

Kataki mu’a ka e pulusi atu ho’o kolomu ‘a e ki’i hoha’a ko’eni mo e fifili fekau’aki mo hotau fangatokoua, tuonga’ane, kui mo e tamai ko’eni ‘oku ui koe kau faka-fāfine pe fakaleiti.

Kuo tau situ’a atu ‘eni mei he’enau fe’auhi fili Miss Galaxy pea ‘oku ou kau he fakaoli’ia ma’u pe he sio ‘i he fe’auhi ko’eni he ‘oku ne hulu’i mai ‘a e konga mo e ‘ata ‘o e to’onga mo’ui ‘a e ni’ihi ko’eni pea ‘oku nau tau’atāina kiai pea ‘i ai mo ‘enau totonu ki he me'a 'oku nau manako ke fakahoko..

‘I he taimi tatau ko e konga lahi ‘enau tau’atāina koia ‘oku ‘ikai ke hōhōa tatau ia mo hotau tukufakaholo, lotu mo e anga ‘etau nofo mo e tu’unga faka-mōlale he sosaieti.

Ko e poini ‘oku ou feinga ke ‘oatu heni ‘Etita ko e tau’atāina koia ‘oku nau fiefia ai pea ‘oku te’eki ke ala atu e lao ia ke ta’ofi ‘enau tau’atāina koia neongo ‘oku ‘i ai ‘a e ngaahi konga ‘o e lao ‘oku ne tapui ‘a e ngaahi to’onga ‘a hotau ni’ihi ko’eni.

'Oku ‘ikai ke fakamalohi’i 'eni pea ‘oku nau taua’atāina pea ‘e toe malava pe ke ui ‘oku nau maumau lao pe fahu ‘i he fonua.

‘I he’ene pehe ‘oku totonu kenau fiefia ‘i he’enau ma’u ‘a e tau’atāina he fonua ka ‘oku ‘ikai ko hono teke fakamamani lahi ‘e honau ni’ihi ‘o tukuaki’i ‘oku nau popula ‘i he nofo hotau ki’i fonua ni.

‘Oku totonu pe ke mahino ‘oku kehekehe ‘a e ‘atakai faka-sosiale mo faka-politikale pehe ki he faka-tukufakaholo he fonua kotoa pea kuopau ke tau popula ki he ngaahi tu'utu'uni 'a e lao mo e sosaieti kae ma'u 'a e tau'atana mo'oni.

Ko e tau’atāina 'i ha fa'ahinga sosaieti ‘oku ‘i ai ‘a e ngaahi ha’i faka-tukufakaholo, faka-lotu, faka-mōlale, faka-lao mo e hā fua ‘oku totonu pe ke fakatokanga’i mo faka’apa’apa’i telia ‘a e anga ‘etau nofo.

Na’a tau sio pe he’enau fe’auhi mo 'enau fiefia pehe ki honau teunga (tapu ange mo kinautolu) pea ‘oku ‘i ai ‘a e tui ‘oku fu’u ta’efe’unga mo e anga ‘etau nofo ka ‘oku nau tau’atāina kiai pea na'e 'ikai ke ta'ofi 'eha taha..

'Oku ‘i ai ‘a e fifili pe ko ‘enau toe feinga ki he totonu mo e tau’atāina fē he ‘oku nau lolotonga fa’iteliha pe hotau fonua ni.

Faka’apa’apa Atu,

‘Ofa Fonua