Kei 'ao'aofia 'uhinga fakafoki ‘o Lord Ma’afu ki he Lakanga Minisitā Fonua & Malu’i Featured
Lord Ma'afu
18 May, 2018. Kuo fakamahino ‘e he Palēmia ‘i hano faka’eke’eke ‘i he Letiō ‘a hono fakafoki ‘o Lord Ma’afu ki he lakanga Minisitā Fonu & Malu’i.
Ko e fakamatala ‘a e Palēmia tokua na’e hoko ‘a e tō kehekehe ‘i loto ‘i he vā ‘o e kau Minisitā ‘o e Kapineti pea kuo fai e fakalelei pea ‘oku tupu mei ai hono fakafoki ‘o Lord Ma’afu ki he fatongia ‘o makatu’unga ‘i he’ene taukei.
Ko e vā ‘eni ‘o e Minisitā Polisi mo e Minisitā Fonua pea na’e ‘i ai ‘a e tō kehekehe ‘o a’u ki he tu’unga ko hono tuku mai ‘e he Ministā Polisi ‘ene mamahi ‘i he mītia ‘o a’u ki he’ene teu ke fakafisi.
Ko hono fakafoki ko’eni ‘o Lord Ma’afu ‘oku kehekehe lahi ‘eni ia mo e ‘uhinga na’e tuku mai ‘e he Palēmia hili ‘a e fakafisi ‘a Lord Ma’afu ‘a ia kuo ‘osi mea’i ‘e Hou’eiki pea ‘ilo kiai ‘a e kakai ‘o e fonua.
Na’e toutou ‘ohake ‘ehe ngaahi kautaha mītia ‘a e ‘ikai tali ‘e he Tu’i ‘a e fakafisi ‘a Lord Ma’afu mo e toutou feinga ‘a e Palēmia ki ha taha mei he Fuifuilupe ke fetongi ‘a Lord Ma’afu.
Na’e toe ma’u pe foki ‘e he ongoongo ni ‘a e fakamatala falala’anga mei he Potungāue Fonua mo Savea na’e ‘osi me’a ange ‘a Lord Ma’afu ki he fatongia ‘i he uike ‘e ua kuo maliu atu hili hano ‘ikai tali ‘e he Tu’i ‘ene fakafisi ka na’e toe tohi ‘a e Palēmia ki he Potungāue ‘o fakahoko kiai ‘oku kei hoko atu pe ‘ene le’ole’o ‘i he lakanga Minisitā Fonua.
‘Oku mahino ki he tokolahi ‘i he fonua koe foki ‘a e Lord Ma’afu ki he lakanga ko e me’a totonu pe ia ke fakahoko ‘e he Palēmia ‘o makatu’nga ‘i he taukei ‘a Lord Ma’afu mo e fiema’u ke malu ‘a e kelekele ‘o fakatatau ki he fiema’u ‘a e kakai ‘o e fonua ‘i he liliu faka-politikale pehe ki he’ene taukei ‘i he malu’i.
‘Oku fakamālō’ia ai heni ‘a e fakahoko ‘e he Palēmia ‘a e tu’utu’uni totonu ko’eni ka ‘oku ‘i ai ‘a e tokolahi ‘i he fonua ‘oku ‘ikai ke malava kenau muimui’i lelei pe koe fē ‘a e ongoongo ‘oku mo’oni he ‘oku feliuliuaki pe ‘i he taimi kotoa ‘a hono ‘omai mei ‘e he Pule’anga ‘a e ngaahi ‘uhinga mo e ongoongo.
‘I he taimi tatau ‘oku hulu’i mai ‘e hono fakafoki ‘o Lord Ma’afu ki he fatongia ‘a e ‘ikai ke hokohoko lelei ‘a e tu’utu’uni faka-taki pea moe mahu’inga ke fakapotopoto hono fakahoko ‘a e tu’utu’uni mo e mafai kae tu’uma’u mo tolonga pea ‘ata lelei ai ‘a e fonua ki tu’a.
