Hoha’a lahi ‘a e Palēmia ki he Tohi Tangi ke fakahifo ia: Faka’ilonga nai ‘eni ‘o e ilifia? ^Featured

Ko e Tohi Tangi ko’eni ‘oku taki mai ai ‘a Mele ‘Amanaki pea ‘oku hoha’a ‘a e Palēmia tokua ‘oku takihala’i ‘e he Tohi Tangi ko’eni ‘a e kakai ‘o e fonua pea ‘oku totonu tokua ke mahino ‘a e makatu’unga ‘o e Tohi Tangi ko’eni telia na’a fakamo’oni ‘a e kakai ‘i ha me’a ‘oku ‘ikai kenau 'ilo mo loto kiai.

Na’e toe ho’ata mai foki mei hono faka’eke’eke ‘o e Palēmia ‘a ‘ene hoha’a na’a a’u ki he Tu’i ‘a e fa’ahinga Tohi Tangi ko’eni pea fakahoko ‘e he Tu’i ha fa’ahinga tu’utu’uni ‘e kau kovi ki he fonua.

Na’e toe hoha’a foki ‘a e Palēmia pe koe hā ‘oku ‘ikai pu’aki mai ai ‘a e hingoa ‘o e Minisitā mo e Talēkita Poate ‘oku na fa’ufa’u tokoua ke to’o ‘a e mafai ‘o e Tu’i pea ‘oku tufaki holo he mitia faka-sosiale.

‘Oku kau ki heni mo ‘ene hoha’a pea koe hā ‘oku ‘ikai tuku mai ai ‘a e hingoa ‘o e kau Minisitā ‘oku ‘uhinga kiai ‘a e Tohi Tangi.

Ko e ngaahi hoha’a ko’eni ‘a e Palēmia ‘oku hu’u mei ai ‘a e ngaahi talafili mo e ngaahi fehu’i ko’eni?

1. ‘Oku ‘ikai pe ke tui ‘a e Palēmia ia ‘oku hala ha’ane laka ‘e taha mo ‘ene Kapineti

2. ‘Oku ‘ikai tui ‘a e Palēmia ia neongo ‘oku ne fakasisi mai pe ‘oku ‘i ai ‘a e totonu ‘a e kakai ‘o e fonua mo e tau'atina,  ke toe fehu’ia ‘a ‘ene founga taki mo e founga ‘oku ne fakalele’aki mo ‘ene Kapineti ‘a e fonua

3. ‘Oku ngalo iai iate ia ‘a e ngaahi takilaha’i ‘o e kakai ‘a ia na’e toutou moua ai ‘i he Fakamaau’anga mo e ngaahi Tohi Tangi mo e ngaahi Laka na’a ne uki ki mu’a ‘o a’u ki hono tutu ‘ikai ha makatu’unga ‘o Nuku’alofa

4. Ko e ‘ata ‘eni ‘o e ilifia mo e tailiili telia na’a mavae mo e mafai mo e ngeia ‘oku ne lolotonga ma’u?

5. Me’a ni ‘oku ‘ikai kene ‘ilo ‘a e ngaahi ‘isiū lolotonga fekau’aki mo’ene kau Minisitā ‘a ia ‘oku hoko koe me’akai faka’aho ‘a e ngaahi mitia mo e mitia faka-sosiale kae fakahangahanga kehe pe?

6. ‘Oku ne feinga ke tohoaki ‘a e tokanga ‘a e kakai ‘aki hono tukuaki’i ‘a e kau poupou ‘o e Tohi Tangi ki he fakamoveuveu ka ‘oku ‘ikai ha’a ne makatu’unga

7. ‘Oku ne kei lolo ai pe ‘a e tau’atāina ke fakaha ‘a e fakakaukau mo lea?

8. Ko e ha 'a e palopalema ka faitu'utu'uni 'a e Tu'i 'i ha tangi atu hono kakai?..

‘Oku fu’u ho’atāina ‘a e ngaahi fehalaaki mo hono ngāuehala’aki ‘o e mafai ‘i he ngaahi ‘aho ni pea ‘oku fakanatula pe ia ke tu’u ‘a e kakai ke ta’ofi ‘a hono fakaehaua ‘o ‘enau ngaahi totonu he koe kau totongi tukuhau kinautolu.

'Ikai ngata ai ka 'oku nau tu'u ke fehu’ia ‘a e founga hala mo fakamoveuveu ‘oku tataki ‘aki ‘a e fonua 'o iku ki he longoa'a lahi kuo hoko 'i he fonua 'i he ngaahi 'aho ni.

‘Oku faka’ohovale ‘a e hahanu ‘a e Palēmia ‘i hono faka’eke’eke mai ia he Letiō pea ‘oku ho’ata mai ‘a e hoha’a ‘a ia ‘oku fo’ou ia kiha taki ‘o ha Pule’anga Temokalati ke kumi ‘uhinga ke fakafepaki’i ‘aki ha totonu faka-Konisitūtone ‘a ha falukunga kakai ‘oku nau tu’u ke fakahoko ‘enau totonu kuo foaki ‘e he Lao mo e Konisitūtone.

'Oku 'ilonga lelei hono 'ohofi 'e he Palēmia mo 'ene tangata fale'i 'a Mele 'Amanaki ka 'oku totonu ke tukuange ‘e he Palēmia ‘a e Sino ‘o Mele ‘Amanaki ki he tafafa’aki ke mavahe mei he ‘uhinga  ‘o e ngāue ‘oku fakahoko ‘e Mele ‘Amanaki tukukehe ange ‘a e fu’u kakai tokolahi faufaua ‘i he fonua ‘oku nau poupou mo teke ‘a e Tohi Tangi ko’eni.