Tukuaki’i Palēmia Potungāue Polisi lahi hono ngāue ‘aki faito’o konatapu 'i he fonua: ‘Ikai tuku e politiki faka Lautohi Pule’anga ^Featured

Ko e fakamatala foki ‘eni ‘a e Palēmia ki he Letiō Nu’usila ‘a ia ‘oku faka’ohovale kiha taki ‘oha fonua ‘a ia koe ‘ulu ia ‘o e Pule’anga kene tukuaki’i ‘a e taha ‘o ‘ene Potungāue ‘a ia 'e malava pe ketau fakalea 'oku 'uhinga 'eni ‘oku faka’ai’ai ‘e he Potungāue Polisi ‘a e hakotupu ‘o e fonua kenau ngāue’aki ‘a e faito’o konatapu.

Ko e ‘uhinga ‘oku ‘omai tokua ‘e he Palēmia ko e Komisiona Polisi ‘oku ‘i ai ‘a e mafai ke fakahū pilīsone ‘a e kakai pea ke faka’ilo kinautolu.

‘Oku toe fakatupu fifili he na’a ne toe me’a ki he Letiō Tonga ‘o pehe ‘oku ‘ilo ‘a e Minisitā Polisi kiate kinautolu ‘oku nau fetuku holo ‘a e faito’o konatapu ka ‘oku ‘ikai hano mafai kiai.

‘Oku fakaloloma ‘a e fa’ahing fakamatala ko’eni pea ‘e lava pe ketau pehē koe loi mo hono takihala’i ‘o e kakai he ‘oku muimui’i pe ‘e he fonua ‘a e ngaahi hopo mo hono puke ‘e he kau polisi ‘a e kakai ‘oku nau ngāue’aki ‘a e faito’o konatapu pea kuo tautea ngāue pōpula ‘a e ni’ihi pea mo’ua pa’anga mo malu’i ‘a e tokolahi ‘i he taimi kotoa pea 'oku tuku mai 'e he ngaahi mitia.

‘Oku malava pe ke tau pehe koe tukuaki’i ‘eni ‘i he ‘uhinga fakapolitikle pea ‘oku tekeutua foki mei heni ‘a e taumu’a ke tukuange ‘a e Komisiona Polisi kae lava ke fa’iteliha ‘a e Pule’anga ki he ngaahi me’a ‘oku nau loto ke fakahoko ‘o fakatatau mo ‘enau ‘asenita faka-politikale ‘a ia kuo ‘osi tuku mai ‘e he ngaahi mitia pea ‘ilo kiai ‘a e tokolahi ‘o e kakai ‘o e fonua.

‘Oku ‘ikai foki ke puli ‘a e feinga ‘a e Pule’anga ke to’o ‘a e ngaahi mafai ‘oku ‘i he Tu’i ‘a ia ‘oku kei malu ai ‘a e fonua pea ‘oku fu’u ngalivale ‘eni he ‘oku ho’ata mai ‘a e politiki faka-lautohi Pule’anga ‘a ia ‘oku tekeutua mai ki he kakai ‘enau ‘asenita pea ‘oku fu’u ta’efeunga.

‘Oku ‘ikai ke ‘i ai ha Potungāue Polisi ia ‘i mamani ‘e ta’e ‘i ai ha’anau tōnounou pea ‘oku ‘i ai mo e mafai ‘a e Minisitā Polisi ke tu’utu’uni ki he Komisiona ke fakahoko ha ngāue ki he ngaahi kaveinga ‘e malu ai ‘a e fonua ‘o fakataau mo e Lao Polisi 2010.

Ko e hā ‘oku foaki ai ‘a e pa’anga ‘e laukilu ke fakatotolo’i’aki ‘a e paasipooti ‘oku ta’e mahino hono tukunga pea kei hokohoko mai hono fakakau ki he patiseti ‘a e Potungāue Polisi kae ‘ikai ke foaki ha pa’anga ia ke tau’i ‘aki ‘a e faito’o konatapu.?

‘Oku fu’u fakaoli ‘a e fa’ahinga politiki faka-lautohi Pule’anga ko’eni he ‘oku ne ‘ave ai pe ki mamani ‘a e tu’unga ma’ulalo mo mamaha ‘oku ‘i ai hono tataki ‘o e fonua.

Ko e Komisiona Polisi foki ‘o e aho ni ko e tangata Nu’usila ko Stephen Caldwell pea koe konga hono vāhenga ‘oku fakapa’anga ‘e he Pule’anga Nu’usila mo ‘Aositelēlia ‘i he malumalu ‘o e polokalama tokoni ‘a e ongo fonua ni ki hono fakalakalaka ‘o e Potungāue Polisi ‘a Tonga.

Kapau ‘oku ‘i ai ha faihala ‘a e kau Polisi pea ‘oku totonu ke launga’i ke fakahoko ha ngāue kiai ‘o fakatatau ki he Lao Polisi 2010 ka ‘oku ‘ikai ko hono matu’aki lafo’i fakakauleka mai ‘a e ‘uhinga ‘oku ‘ikai hano makatu’unga pea ‘oku fakaoli mo fakatamaikivale.

Kapau ‘e ‘oange ‘e he Minisitā Polisi ‘a e hingoa ‘o kinautolu ‘oku nau fetukuholo ‘a e faito’o konatapu ki he Komisiona Polisi pea ‘oatu fakataha mo hano ngaahi fakamo’oni ‘e malava ke puke ai kinautolu ‘o faka’ilo pea ‘oku ‘i ai ‘a e tui ta’e toe veiveiua ‘e fakahoko ‘e he Komisiona Polisi ‘a e ngāue kiai 'o fakatatau mo e lao.

Kapau 'e 'ikai leva kene fakahoko 'e he Komisiona ha me'a kiai pea 'oku 'i ai leva 'a e makatu'unga lelei ke fakangata 'ene fakahoko fatongia 'o fakatatau mo e Lao Polisi 2010.

‘Oku ‘i ai pe ‘a e tui ‘e toe malava pe foki ki he Minisitā kene fakahoko ha faka’ilo fakataautaha fekau’aki moha kakai ‘oku ne ‘ilo pau pea ‘i ai ha’ane fakamo’oni ki ai ‘oku nau fetuku holo ‘a e faito’o konatapu pea faka’ai’ai ‘a e hakotupu mo e kakai ‘o e fonua kenau ngāue’aki.

‘Oku fu’u fakatupu fifili ‘a e tukuaki’i ko’eni pea ‘oku mahino lelei ‘a e ‘asenita faka-politikale ‘oku muimui mai ai he koe 'osi 'eni 'a e ta'u 'e 3 'a e fakahoko fatongia 'a e Palēmia pea koe ha kuo toki 'ohake ai 'eni he 'aho ni.?

'Oku toe 'i ai 'a e fifili na'a koe feinga 'eni ke 'oua 'e toe tuputamaki 'a e Minisitā Polisi 'o toe teu fakafisi.