Ha hono mahu'inga 'a e fakataha 'a e Palemia, Minisita Polisi, Minisita Lao mo e 'Ateni Seniale ke tukumai ki he kakai?: Mele 'Amanaki ^Featured

Ko e fatongia totonu pe eni 'o e 'Ofisi 'oe Ateni Seniale he ko kinautolu 'oku nau fakafofonga'i 'ae Pule'anga 'iha hopo he Fakamaau'angaa pea ko kinautolu 'oku 'iai e Fakahinohino Lao 'a e Pule'angaa (Solicitor General) pea ko kinautolu 'oku nau fa'u e ngaahi Lao Fakaangaanga 'oku fiema'u he Pule'anga (Kapineti) ke fa'u. Ko e fatongia ia e PM ka oku ne fie 'ilo ki ha tu'unga e ngaahi hopo e Pule'angaa ke ui atu e AG ke ha'u ke na talanoa kiai. Ka oku fiema'u ke liliu ha lao pe konisitutone koe ui atu e AG pe SG he koe Pule'anga pe taha!!!

Ka koe toki hoko eni he Pule'anga Tonga ke tu'u fehangahangai pe 'ae ngaahi sino malu'i e Fonuaa, Kapineti, AG's Office, Potungaue Lao, Potungaue Polisii moe Potungaue Malu'i.... halaloa ke hoko ha me'a pehee ki mu'a... ka koe ha? 'AFIO 'A TUPOU MEI TAUMU'A KAE HOHOLI ATU E KAU ME'A HE KAPINETII KI HONO KI'I MAFAI 'OKU SI'I KEI TOEE. 'Ae mafai ke fakapapau'i e malu moe hao 'a Tongaa!!

Ka koe ha nai e fu'u MAHU'INGA MAKEHE ai e fakataha ko enii ke tuku mai ko ha ongoongo pe press release? 'Oku taha pe hono 'uhinga 'oku e'a mai meihe PR ko eni:

Kuo longoa'a e fonua he ongo fo'i submissions (pepa fokotu'u) 'e ua kihe Kapineti na'e tu'utu'uni ke tali, koe taha na'e fakahu he Minisita Polisi pea taha na'e fakahuu he Minisita Lao. Koe ongo pepa fokotu'u ko enii oku na alasi loua 'ae MAFAI PULE 'OE TU'II 'oku kei si'i toee ke pukupuke e malu e fonuaa pea hili e ngaahi fetukuaki mai e ngaahi fakamatala ongoongo (press releases) he uike kuo 'osii mei he PM, Ministry of Defence, Minister of Police moe AG's Office na'e toki fakatokanga'i he PM 'a e ta'efakalao 'enau ngaue he Kapinetii pea tukuange mai e press release ko enii. He 'oku 'ikai 'ilo foki he Kakaii ia 'oku 'ataa pe 'a e AG's office ia kihe PM, kau Minisita moe CEOs ke nau kole ha tokoni ha taimi pe. Kae hangee mai e press release ia tokua 'oku 'ikai ha fengaue'aki fakatahaa.

Koe MoP moe MoJ na'e 'ikai ke na loto ma'ulalo ke na kole 'ae tokoni 'ae AG pe SG ki he'ena sumissions na'a na fa'uu oku longoa'a ai e fonuaa. Fale'i atu e Ma'afu ke mai ha fale'i fakalao mei he AG fisi'ia e MoP ia 'o fakafisi!!

Fokotu'u atu kihe PM ke tali atu e tohi fakafisi e MoP pea fekau'i atu moe MoJ ke fakafisi.

Ka 'oku mahino heni 'ae 'ikai lava e PM ke control 'ene Kapinetii he'ene kole 'ae Minisita na'e fili mo fakanofo 'ehe Tu'ii (Ma'afu) ke 'oua 'e me'a ange kihe fakataha na'a nau alasi ai e mafai 'oe Tu'ii pea mo fekau'i ke fakafisi e Minisita na'e fili he Tu'ii... !! Koe toe fusi mafai 'eni 'e taha!...... Koe Tu'ii pe taha 'oku mafai ke ne fekau'i 'ene Minisita Malu'ii ke fakafisii! Kuo fepakipaki e ngaahi mafaii he hulutu'a e fiema'u mafaii!! Na'a kuo taimi ha early retirement PM?!

Malie lahi e PM's Press Secretary! Ko e me'a tatau pe 'eni na'a ne fai he'ene Press Secretary kia PM Sevelee, koe tuku mai e ngaahi fakamatala ongoongo ke si'i fakapulou'i e Kakaii he fehalaaki 'ae PM!

Kole atu kihe kau CEOs moe kau Ngaue Fakapule'anga Ma'olungaa. 'Oku mahu'inga homou fatongia ki hono fakalele faka'aho e Pule'angaa. Kapau kuo mo'ua pe 'ae PM moe kau Minisita he kapa kihe mafai e Tu'ii, mou kataki 'o tokanga atu aa moutolu kihe fakalele faka'aho e Pule'angaa ke tokoni'i e Kakaii!

Maloo e fua fatongia lelei moe kataki!