‘Ikai Lava ‘ufi’ufi’i na’e faihala ‘a Pohiva Tui’onetoa: Lipooti 'Atita ^Featured

Ko e lipooti foki ‘eni fekau’aki mo e taimi na’e ‘i he lakanga ‘Atita Seniale ai ‘a Dr. Pohiva Tui’onetoa ‘a ia ‘oku lolotonga hoko koe Minisitā Polisi pehe ki he Potungāue Fefakatau’aki mo e ngaahi ngāue ‘a e Kakai.

Ko e konga foki ia ‘a e me’a ‘a Dr. Pohiva Tui’onetoa lolotonga ‘a e feme’a’aki ‘i he Fale Alea na’e ha ai ‘ene pehe “‘Ikai Lava ke ‘ufi’ufi’i” ‘a ia ‘oku ho’ata mei ai na’e ‘i ai ‘a e fehalaaki mo e palopalema na'e hoko.

‘Oku malie ‘a e feinga ‘a Tui’onetoa ke kalofi ‘a e ngaahi mo’oni’i me’a ‘oku hā ‘i he lipooti tau’atāina ko’eni ‘o kau ai ‘ene fakahū ‘a e pa’anga ‘ova taimi ‘i he’ene ‘akauni fakafo’ituitui, pa’anga na’a ne ma’u ko e $6000 koe monu’ia ‘a ia na’a ne toho lolotonga 'ene kei ‘Atita Seniale pea fili ia ‘o Memipa Fale Alea ka kuo ne ‘osi toho pea fiema’u ke ne fakafoki.

Na’e toe ‘i ai mo e ngaahi vahe ne ‘ikai ke tukuhaui’i pea ‘oku ‘ao’aofia pe koe hā ‘oku kei kalo holo ai e ‘Atita Seniale Malōlō. Hange pe ko ‘ene lea ki mu’a ‘ikai lava ha’ane kalofaki ke ‘ufi’ufi na’a ne toho e silini pea fakahū e pa’anga ‘ovataimi ki he’ene ‘akauni taautaha.

‘Oku malie foki ‘a e fakahoko ‘e he Hou’eiki Nōpele ‘a e fatongia fakaanga pea ‘oku hā mei heni ‘a e feinga ‘a Tui’onetoa ke faka’uhinga ‘a e lao ke fakatonuhia ‘a e ngaahi ngāue hala na’a ne fakahoko hange koia kuo tuhu’i ‘e he lipooti ko’eni.

Neongo ‘a e ngaahi taukapo ‘oku fakahoko ‘e he kaunga Minisitā ka ‘oku mahino pe ‘oku ‘ikai malava ke ‘ufi’ufi ‘a e ngaahi me’a ‘oku ha he lipooti ‘a e ‘Atita. 'Oku toe fakamahino mai pe foki 'e he Kupu 16 'o e Lao ki he Pa'anga 'a e Fonua mo hono Tauhi (Public Finance Management Act) 'a e founga ki hono tauhi 'o e pa'anga 'a e Pule'anga mo hono founga.

‘Oku malie lahi ‘a e tauto’e ‘a e Fakafofonga ‘o Vava’u 15 pe koe fē ‘a e ki’i me’a ‘a Sisa ‘a ia na’e ‘uhinga ‘a Vaipulu ki he tukuhau na’e ‘ikai ke tanaki makatu’unga he ‘ikai muimui ‘a Tui’onetoa ki he lao.