Tu’utu’uni Ngāue ki hono Fakaava ‘o e Kau’ā Fonuá Featured
28 ‘Epeleli, 2020. Na’e fakataha ‘a e Komiti Fakafonua ki he Ngaahi Me’a Fakatu’upake (NEMC) ‘i he ho’atā ‘o e ‘aho ni ke talanoa’i ‘a e tu’uga kuo a’u ki ai ‘a e ngāue ki hono fa’u ‘o e Tu’utu’uni Ngāue ki hono Fakaava ‘o e Kau’ā Fonuá (Open Border Policy).
Na’e fakahā ai ‘e he Pule Lahi ‘a e Potungāue Fonua, Savea mo e Ngaahi Koloa Fakaenatulá Rosamond Bing ki he fakataha’angá ‘i he ho’ata ‘o e ‘aho ni, ‘a e ngaahi palani ngaue fakaangaanga (draft) mo e fokotu’utu’u ‘a e kōmiti makehe kuo vahe’i kenau tokanga’i ‘a e tu’utu’uni ngāue ko ‘ení.
‘Oku kau heni ‘a hono siofi ‘a e tu’unga mateuteu ‘oku ‘i ai ‘a e fonuá ‘i he tafa’aki ‘o e ngaahi nofo’anga ki he fakamavahe’i makehé (quarantine facilities) kau ki ai mo hono siofi ‘a e tu’unga malu ‘o e kau ngāue tenau fakahoko fatongia ‘i he ngaahi nofo’anga ni mo e tokolahi ‘o e kakai ‘e faka’atā ke nau tu’uta mai ki Tonga ni, ‘i ha taimi ‘e fakaava ai ‘a e kau’ā fonuá.
Ko e tu’utu’uni ngāue ko ‘ení ‘e fa’u ia pea fai mo hano muimui’i pau ke fenāpasi mo e tu’unga mateuteu ‘oku ‘i ai ‘a e fonuá mo e Potungāue Mo’uí pea toki fakapaasi ‘e he Kapinetí ke fakapapau’i ‘a e malu ‘a e fonuá mei he COVID-19 ‘i ha taimi ‘e fakaava ai ‘a e kau’ā fonua.
