“ MĀLŌ DR. HELU...Mahino 'a e mole hotau vaká 'i he vahanoá ko e tataki hala'i kitautolu 'e he 'eiki-vaká, mo 'ene fanga poné. Neongo na'e 'osi 'oatu 'a e ngaahi fale'i 'a e kau mataotao 'i he mala'e akó, mo e IT tekinolosiá, fika mo e setisitiká, ka e fai pe 'a e tu'utu'uni faka-tikitato 'a e PM, ko 'enau faka-poné.
1) Mo'oni ho'o faka-ma'ala'ala maí 'o e fiema'u 'o e setisitiká ko e tefito'i aka 'o e 'analaiso fakatotolo (research analysis) ke vete pe solova ha palopalema faka-ako, 'a ia 'oku faka'aonga'i 'a e ngaahi founga fekumi faka-saienisi (scientific methodologies).
2) Mo'oni ho'o faka-ikiiki maí, kuo pau ke 'ohake mo faka-e'a mai 'a e palopalema ke solová: Pehē 'e he PM mo 'ene fanga poné, "Kuo tō-lalo 'a e akó 'i Tongá ni." Pea fehu'ia 'e he 'atamai hu'uhu'ú (critical thinking), ko e 'ilo ia meifē?
3) Hangē ko ho'o laú, na'e 'omai e kau taukei tau'atāiná. Ka ko hono toe 'oange pe 'o e fatongiá kia Pīveni Piukala mo Siaosi Pōhiva kena fai e vetekiá (diagnosis) mo hono faito'o (treatment). 'A ia ko e palopalema "conflict of interest" ia 'i he mala'e ako faka-saienisí. Ko 'ena fa'ufa'u 'a e fakamatala 'o e vetekiá (diagnosis) ke faingamālie ai 'a 'ena fo'i vai faka-moli-Tonga (treatment) ke ma'u ai 'ena ngāue totongi faka-pone mo e faka-famili (nepotism).
4) Pea ka oku kei mālohiange 'a e 'ikai ke lava 'o faka-mavahe'i (isolate) 'a e fekau'aki mālohí (correlational relationship) 'o e 'analaiso faka-fiká mo e setisitiká (quantitative analysis), pea 'oku totonu ke fai e fekumi-'ahi'ahi "experimental research". Ke fakamatala pe ko e mo'oni tokua ko e tōlalo 'a e akó ko e ngāue (cause-and-effect) 'a e maaka tulifuá.
Kaekehe, kuo tu'utu'uni mai 'e he PM ia tokua ko e maaka tulifuá (standardization assessment) 'oku ne faka-tōlalo'i 'a e akó. Hili ko iá, ko e lau faka-mahamahalo pe 'a Piveni mo Siaosi, ka e sītu'a mei he fale'i 'a e kau mataotaó 'i he akó. ”