“ PASIPASI PEA TU'U 'O TUETUĒ MA'A "'ANA HETI VEIKUNE..." Mālō ko 'ene fakahāhā loto 'aki 'a 'ene fokotu'utu'u lāunga masani. Kuo ne fakamatala tāsilosilo 'emau puputu'u mo 'emau loto mamahi 'i he fu'u tōlalo 'a e ngāue 'a e Potungāue Akó ki homau fanga 'uhiki 'i he sivi 'o e 2015.
Pea ko hono faito'o totonu ia 'o e ta'e faka-temokalati 'a e founga liliu 'o e polokalama komipiutá ke lāunga'i ta'e tuku. Pea 'ekea faka-momoiki 'a e 'uhinga na'e liliu ai mei founga na'e ngāue'aki 'i he ngaahi ta'u 'o a'u mai ki he 2014.
Na'a ku nāmu'i ha ki'i kumā mate (fakatapu atu) 'i he fakahā 'e Palēmia 'Akilisi Pōhiva 'i hono faka'eke'eke 'e Viola Ulakai 'i he TV Tongá 'i he kamta'anga 'o e ta'u ako 2015. Tokua na'e lāunga'i 'e he mātu'a tokolahi 'a e ola 'o e sivi mei he 2014. Pea u fifili ai 'o faka'eke'eke pe ko e mātu'a 'e toko fiha na'a nau lāungá? 'Eke atu ki he 'Ofisi 'o e Palēmia pea talamai ke faka-'eke'eke ki he Potungāue Akó. Talamai mei he Potungāue Akó ke 'eke ki he Palēmiá he ko ia na'a ne fai 'a e tu'uaki ko iá.
Ko e me'a ia 'oku ui 'i he mītia ko e "faka-holisi-maka" (stonewalling): Ko e fetūukuaki 'a e kau ngāue fk-Pule'angá ke tuhu'i holo 'o ha maumau kuo hoko. Pea hoko ai mo 'ete hela'ia he lele holó, pea talu ai hono tanumia 'ete feingá koā.
Pea ko hono faito'ó leva ke fai ha'a te fekumi 'o pulusi ke faka'ata tāsilosilo (illustrate) 'enau me'a 'oku faí. Tuai-e-kemo 'a e pulusi 'eku fekumi (research) mo 'eku faka-'uhinga'i (analysis) 'o 'enau founga faí, kuo nau 'oho mai hangē ha fanga-ulofí fekaí.
Ko e founga hala pea kākā ke faka-pone'i ai hono 'omai 'a Piveni Piukala mo Siaosi Põhiva ke faka-fetongi 'a e polokalama komipiutá 'a e SPBEA 'aki 'a e "raw marks." Fetu'utaki kia Dr. Vesisio Pongi, ko e taukei tau'atāina pea ne 'ilo ki he ongo tangatá ni. Na'a ne talamai: (1) 'Oku faka-holomui 'a e "raw marks;" (2) 'oku 'ikai lava 'e he ongo tangatá ni 'o fetongi 'a e polokalama (standardize) 'a e SPBEA; (3) pea kuo ne 'osi fale'i 'a e Palēmiá mo e kau Puleakó ke 'oua fai ha fetongi.
Faka-mālō atu kia 'Ana Heti Veikune ko 'ene fekumi mo e fakamatala tāsilosilo 'o e palopalema 'a e Potungāue Akó ki he 'emau fānau akó. Kuo tukuaki'i 'a e valekua 'emau fānaú; ka ko e "kumā-mate" na'a ku 'uluaki nāmu'i 'i he fakamatala 'a Palēmia 'Akilisi Pōhivá, ko e me'a ia 'oku tau namu-ha'a-ha'a kotoa ai 'i he ngaahi 'ahó ni. ”