Mo’ua Pule’anga 'i hono fakangata ta’efakalao konituleki kau ngaue Komiti Sipoti Pasifiki Featured
4 'Aokosi, 2018. Na’e tu’utu’uni ‘e he Tu’i Fakamaau Lahi Justice Owen Paulsen ‘i he Fakamaau’anga Lahi ‘i he ‘aho Tu’apulelulu ‘o e uike ni ‘aho 2 ‘o ‘Akosi 2018 ke tali ‘a e ‘eke ‘a e kau Talatalaaki pea ke mo’ua ‘a e Pule’anga Tonga ki hono fakangata ‘ikai ha fakatokanga (without notice) mo hono fakamalolo’i ta’efakalao ‘a kinautolu na’a nau ngaue ‘i he Komiti Sipoti ‘a e Pasifiki ‘i Tonga ni.
Na’e ‘ulu foki ‘i he kau ngaue ko’eni ‘a e Palemia Malolo Lord Sevele pehe ki he toko 11 kehe ‘a ia na’a nau ngaue ki hono fokotu’utu’u mo palani pehe ki he ngaahi ngaue teuteu atu ki he Sipoti ‘a e Pasifiki Tonga ‘a ia na’e ‘amanaki fakahoko mai ki Tonga ni ‘i he ta’u 2019.
Ko e ngaue lahi foki ‘eni pea na’e ‘osi fakamole ‘e he Pule’anga ‘a e pa’anga lahi kiai ke fakahoko ‘a e ngaue ko’eni kau kiai mo e ngaahi tokoni na’e hanganaki ke hu’u mai ki Tonga ni tukukehe ange ‘a e ngaahi lelei ki he fonua mo hono hakotupu.
Na’e tu’utu’uni ‘e he Pule’anga ke fakangata ‘enau ngaahi aleapau ‘ikai ha fakatokanga kiate kinautolu ‘i he ta’u 2017 pehe ki he ‘ikai fakalao ‘a e founga na’e fakamalolo’i ‘aki kinautolu.
Na’e ‘eke ai ‘e he ni’ihi ko’eni ‘a e maumau fekau’aki mo hono fakamalolo’i kinautolu ‘a ia koe CV 1/2018 ia ‘i he vaha’a ‘o Lord Sevele pea mo e Pule’anga Tonga mo e CV 2/2018 ‘i he vaha’a ‘o Sakopo Lolohea, Naitilima Tupou, ‘Etoni Tonga, Soakai Motu’apuaka, Paula Tu’utaafaiva, Lupe ‘Ilaiu, ‘Ian Tu’ihalangingie mo e toko 4 kehe mo e Pule’anga Tonga.
Fakatatau ki he fakamatala ‘a e loea ‘a e kau Talatalaaki William Edwards Jr. ‘oku fakahoko ‘i he ‘aho 24 ‘o ‘Aokosi ‘o e mahina ni ‘a e toe fakataha ‘i he Fakamaau’anga ke fakamahu’inga’i ‘a e maumau ko’eni ‘a ia koe fika ia ‘e totongi ‘e he Pule’anga Tonga.
Ko e maumau ko’eni koe maumau lahi pea ‘oku ‘i ai ‘a e ‘amanaki ‘e ‘eve’eva atu ‘i he lau kilu ‘a e mo’ua ko’eni pehe ki he fakamole ‘o e fakatonutonu ko’eni.
